HIV係「愛滋病病毒」,學名係「人類免疫力缺乏病毒」,佢個名其實話咗俾我地聽,佢指緊嘅只係個病毒,而非個病,依度好多人都會搞亂架。係感染HIV嘅初期,病毒會係身體入面繁殖得好快,而我地身體亦都有機會出現一D感染徵狀,包括發燒、淋巴腫脹等等,之後就會進入潛伏期喇。係潛伏期入面,HIV嘅繁殖速度會放緩,而我地身體亦都唔會再有明顯嘅病徵。如果我地繼續唔處理佢唔開始治療嘅話,HIV會持續影響我地嘅免疫力,當我地嘅免疫力被降低到一定程度嘅時候,我地身體就會好容易被其他病毒細菌感染,嚴重影響我地嘅健康,造成機會性感染,亦都即係愛滋病病發。所以我地睇到,由感染HIV初期到潛伏期,都係屬於HIV感染嘅階段,而當我地身體出現一個或更多嘅機會性感染嘅時候,我地先係去到愛滋病嘅階段,即係AIDS啦。 HIV同AIDS其實有好明顯嘅分別架,而HIV藥物治療亦可以避免HIV感染者去到愛滋病病發嘅階段。如果我地正確跟隨醫生指示服藥,藥物治療可以成功抑壓身體嘅HIV,阻止病毒對我地嘅免疫系統造成影響,咁我地亦都唔會有機會性感染。就算我地真係去到愛滋病病發嘅階段,只要處理好機會性感染嘅部分,同時開始HIV藥物治療改善健康情況之後,愛滋病病人亦有好大機會變返HIV感染者。所以HIV並非等於AIDS,而好多HIV感染者係佢嘅一生當中都唔會經歷到AIDS病發嘅階段。

//

//

//